تخاريف (8) .. خد بالك من نفسك

خد بالك من نفسك
لان محدش هيحس بنفسك غير نفسك

التخريفة الثامنة

كل ما تكتر الهموم و تزيد الاوجاع
و تحس بنفسك مخنوق .. و تعبان
موجوع بجد .. من كتر اللي بتشوفه
او بتسمعه .. او بتعمله
بيبقى نفسك تلاقي اللي يخفف عنك
و بطبيعة الحال .. هتفتكره اقرب حد ليك
اقرب حد ليك .. صاحب او حبيب .. او .. او
هتجري عليه و تشكيله
بس افرض هو مفهمش .. محسش
هتعمل ايه ؟؟؟؟؟؟؟؟؟

اكيد هتتوجع زيادة
لان ظنك .. مش في محله
دايما بيتهيئلنا ان اقرب حد لينا
هو دا اللي في ايده الدوا لكل حاجة في حياتنا
همومنا .. اوجاعنا .. حيرتنا
بس ممكن يكون هو اللي بيزودهم عندنا
لانه مش فاهم .. ولا حاسس

عارفين بقى الحل فين ؟
فينا احنا
الاحسن لينا وللي حولينا
اننا ناخد بالنا من نفسنا
و نسمع نفسنا
و منحطش املنا في حد معين اوي
لانه ممكن ميفهمش .. ولا يحس
خد بالك من نفسك
لان محدش هيحس بلي فيها غيرها
محدش هيفهمك قد نفسك
يبقى تروق كدة
و تسمعها
و تحل مشاكلها لوحدك .. و بنفسك

اللي أكتشفته قريب اوي
ان محدش بيحس بوجع التاني
ولا بيفهمه قده
يبقى مفيش حل غير
انك تسمعها .. و تواسيها بنفسك

و مهما زادت الهموم و الاوجاع
اعرف ان الكبير فوق كل شيئ
وانك حتى لو مفيش حد حوليك
فا ربنا .. وحده .. معاك

تخاريف (7) .. مع اني سبته

مكنتش بصدق لما يقولوا
مع اني سبته الا اني مكرهتوش
بس بعد كدة .. بدأت اصدق


التخريفة السابعة


بقالي كتير مخرفتش
و طبعا مريحاكم شوية من الهذيان بتاعي دا
بس النهاردة عوزاكم تشاركوني الرأي التجربة

أعرف ناس كتير حبوا و عاشوا قصص
ولا اروع .. تتحكي في مجلدات
على حسب ما اسمع يعني
و طبعا كنهاية طبيعية مؤلمة ..
زي اغلب الظروف اللي بنعيشها
لازم يحصل فراق

كنت بستغرب اوي من اللي تقول
مع اني سبته الا اني مكرهتوش
و اقول ازاي يعني ؟؟ دا انا لو مكانها
كان يبقى اهون عليا اقتله و انتحر
ولا اننا نسيب بعض

بس بعد كدة بشوية فهمت
فهمت انو لو انسان كويس
هيخليك تشوف الدنيا من زاوية تانية خالص
هيعلمك حاجات كتير اوي حلوة
هيعلمك ازاي تحب الحياة
و تحب الناس .. و تحب الكون كله
و قبل كل دا .. ازاي تحب نفسك

وحتى لو كان انسان مش كويس
برضو هيعلمك
هيعلمك أزاي تاخد بالك من نفسك بعدين
ازاي متآمنش لحد بسهولة
ازاي تحافظ على مشاعرك علشان
متتجرحش تاني .. و الاهم من دا كله
هيعلمك ازاي تقوى .. و تكتسب خبرة
و تعرف بعد كدة الكويس .. من الوحش

من اللي بيحصل حوليا اتعلمت شوية
اتعلمت ابص بعيونهم
و افهم بعقولهم
و اعيش معاهم تجاربهم
اتعلمت ابص على الي فات
و ابتسم .. و مخافش ابدا
و الاهم من دا كله
اني مندمش
لان اللي محسش الاحساس
دا معايا .. هو اللي خسران
هو اللي كان بيكدب .. وانا اللي كنت صادقة
انا اللي عشت كل لحظة من قلبي
و فرحت بيها .. و معاها
حتى لو كانت كدبة منه
فهي كانت حقيقة مني
و فرحة بجد .. مش كدب

مشهــــد

جلست امامه و وجهها يشع بتلك النظرة الغريبة
حزينة و سعيدة .. بنفس الوقت
تحمل بيدها باقة من تلك الورود التي يعشقها
كان يجلس ثابتاً .. هادئ و صامت
يسمعها .. كما اعتاد ان يفعل

أخدت تحدثه عن ايامها و مايحدث بها
عن اهله و اصدقائه .. و مدى شوقهم له
عن ذاك الطفل الصغير .. دائم السؤال عنه

ظلت تحكي .. و تحكي
و تلمع بعيناها نظرة حب لا تهدأ
تغمرها الفرحة .. و كأنها وجدت الامان .. عندما وجدته

وعندما غابت الشمس .. و خفت الضوء
أستيقظت من حلمها الرائع
وأستسلم هو لنمو عميق
و هدوء غطى ملامحه الملائكية

و قبل ان تتركه
طبعت بشفتيها الصغيرتين
قُبلة على ذلك الحجر الرخامي
ذلك الحجر .. التي نقشت عليه بيدها
هنا يرقد حبيبي .. هنا يرقد المرحوم

تخاريف (6) .. النوت عليا حق

دي مش تخريفة

على قد ما هي واقع عايشينه

التخريفة السادس

في الاول احب اسألكم

حد ضامن عمره ؟؟؟؟؟؟؟

حد فينا عارف هيموت امتى ؟؟؟

طبعا الكل هيقول لاء

لان دي الحقيقة

يعني محدش عارفة بعد ثانية واحدة

هيكون في

نطيب عملنا حساب الحقيقة دي

دورنا عليها ... عملنا ليها حاجة ...

آمننا بيها

بصراحة معظممنا لاء

تقدروا تقولولي احنا عايشينها ازاي ؟

ضحك و لعب و شات

و تريقة على دي و كلام على دا

معظمنا بيعمل كدة

طيب هنقابل ربنا بالحاجات دي ازاي

طبعا مش بقول اننا هندخل النار حدف

بس يعني تفتكروا احنا عملنا اللي ينجينا منها

طيب عملنا ايه يخلي اللي بعدنا يفتكرونا بيه؟

انا اعرف واحد ربنا يرحمه و يغفرله

مفتكرش مرة شوفته فيها بيضحك

او حتى بيبتسم في وش حد

مع ان الابتسامة في وش الناس صدقة

طيب ليه كدة ؟؟؟؟؟؟

يعني الناس تقول الله يرحمه كان كِشر

تعرفوا انا نفسي في ايه ؟

نفسي لما اموت الناس تفتكرني بالخير

نفسي اعمل حاجة كويسة

تفضل عايشة مع الناس بعد ما اموت

تعرفوا ان انا عمري ما خفت منه

الموت يعني

بس بخاف على الي بحبهم منه

لا بتصور حياتي من غيرهم ولا حياتهم من غيري

و دا مش غرور والله

بس لما تحبوا حد اوي هتعرفوا قصدي

انا نفسي ربنا يكرمنا كلنا

و يخلينا دايما فاكرين الاخرة

و يخلينا نعملها كل الي نقدر عليه

كل اللي ينجينا من العذاب وويله

و نفسي بما اني مش ضامنه عمري

لما اموت

تفتكروني بالخيرو الدعاء

و تقروا عليا الفاتحة

آسفة جدا على الكآبة دي

بس حبيت تشاركوني الاحساس

د ا للي فاجئني بيه النهاردة

تخاريف (5) .. فارس احلامي

فارس احلاااااااااااااااااااااامي

حبيب قلبي .. و حبيب ايامي

كما قالت العظيمة شادية

التخريفة الخامسة

كما سبق ووضحت في مقدمة تخريفتي

احدثكم اليوم عن فارس احلامي

بداية الموضوع دا عند البنات كلهم بلا استثناء

و بقولها بكل ثقة

و تبقى كدابة اللي تقول ميهمنيش الموضوع دا

الموضوع يا سادة و ياسيدات

اني من النوع اللي بيُستفز بسهولة

و بيكتب عمال على بطال زي ما انتوا شايفين كدة

يعني واحدة من اصحابي اتكلمت عن خطيبها قدامي

الراجل يعني قايدلها صوابعه العشرة شمع

بيعمل و يسوي و هي مش عاجبها العجب

ليه ؟؟

لانه يا عيني جري وراها

و اتمرمط لحد ماوافقت

ما هما البنات كدة .. عاوزين اللي يكرفهم

يعني انتي كان لازم ربنا يبعتلك واحد يمرمطك

علشان تحسي انه هو دا اللي انتي عاوزاه

و لو حتى كان مع سوء اخلاقه ميتبصش في وشه ..

كان هيبقى على قلبك زي العسل

ولا مهند زمانه

وفي بنات بتطلب مواصفات خيالية

يعني انا مثلا لو قلت عاوزاه

مقفهر الاسارر.. عريض المنكعين.. شلولخ..

اهو زي ما انتوا شايفين

اي كلام فاضي مش معقول ولا مفهوم

بتكلم عن واحد خيالي لاء و مستنية

مهو بالمواصفات دي اكيد مش هييجي

دا عاوز واحد من المخابرات يفك الشفرات اللي بقولها دي

ليه الكل دلوقتي بقى بيهمه المظاهر الفارغة بس ؟؟؟

كل واحدة عاوزة واحد امور و ستايل

و عنده شقة و عربية و مش بعيد فيللا كمان

طيب و الشخصية اللي هتعيشي معاها دي مش مهمة ولا ايه ؟؟؟؟

كلامي مش معناه ان الشباب مش كدة

مع الاسف برضو اغلبهم بيدوروا على ... انتوا فاهمين بقى

مش محتاجين اوضح انا هقولكم

بصراحة الشكل مهم بس مش اهم من الاخلاق

يعني ليه ميفكروش في خُلُق الانسانة او الانسان اللي هتتجوزوا

دا ليه متقولش عاوزاه من حفظة القرآن مثلا

بدل ما تقول عاوزاه عنده عربية

ليه هو ميقولش عاوزها على خُلٌق و دين

بدل ما يقول عاوزها ... انتوا فاهمين برضو

انا مش بقول اني كاملة

حاشة و ماشة الكمال لله وحده

بس حقيقي انا بتمنى من ربنا

ان الفارس بتاعي يكون عارف ربنا كويس

علشان يعاملني كويس .. و يتقي الله فيا

ربنا يكرمني و يكرمكم ان شاء الله

و اخيرا احب اقول ربنا يهيدينا كلنا

و نحاول نبعد شوية عن المظاهر

لانها مش كل حاجة الاخلاق و الالتزام اهم كتير

تخاريف (4) .. العسل و العصايا

سمع هووووووووووووووووووووووووووس


تخريفتي الجديدة وصلت وارجوكم ..
متحكموش عليا ولا على الراوي الاصلي للتخريفةبشكل خاطئ
ارجووووووووووووووكم .. اوعوا تفهموني صح


التخريفة الرابعة
شخص عزيز عليا جدافي مناقشة ودية معاه(و يارتها ما حصلت)
حكالي حكاية غريبة جداو كان بحسن نية بيحاول يثبت صحة كلامه من خلالها
في الاول احب اقولكم ان موضوع المناقشةكان عن احلام الانسان
و منين يقدر يحققها
هو وجهة نظرة ان الحلم لازم يكون بخطوات منطقية متتالية
يعني زي ماقال .. رحلة الالف ميل تبدأ بخطوة ..
و ليس ميل يعني لازم نرتب خطواتنا
و على اساسها نرتب الحلم
و اختلافي معاه كان .. علشان تبقى كبير .. لازم تحلم حلم كبير
دا كان رأيي .. والله قلته في كلمتين ..
هو بقى .. قالي رواية و ليست حكاية
و قلت اشمعنى انا زهقت لوحدي ..
و جبتهالكم تزهقكم معايا
الحكاية بتقول
كان في واحد غلبان
صحى في يوم الصبح
لقى خلية نحل على سطح بيته
و بطريقة ما(هش) النحل
و اخد العسل و حطه في حاجة زي (الاُلة)
و علقها في السقف علشان النمل ميطلعش عليه و ياكله
و قعد يفكر هيعمل ايه بالعسل دا
كان بيفكر بصوت عالي ..
و في ايده عصايا بيحركها مع تفكيره
( معلش .. هي طويلة .. و مملة .. بس هتفيدنا)
المهم قال هبيع العسل و بتمنه ..
اشتري بيض من البلد دي
وابيعه في بلد تانية بسعر اعلى
و اكسب
و بتمن البيض اللي هو اعلى من تمن العسل
هشتري جبنه من البلد دي
و ابيعها في بلد تانية
و اكسب
و بتمن الجبنة اللي اعلى من العسل و البيض
اعمل معمل جبنة صغير في بيتي
و ابيع منه لاهل البلد
و اكسب
(معلش صبركم بالله .. هتخلص اهه )
المهم
بالمكسب بتاع معمل الجبنة
اشتري حتة ارض
و اعمل عليها مصنع جبنة كبير
و ابيع منه للبلد دي و للي جمبها
و اكسب
بس انا محتاج مكن يصنع الجبنة
هجيبه منين ؟و بكام ؟؟
و قعد يفكر و يفكر هيعمل ايه
علشان يجيب تمن المكن
قال هبيع حتة من الارض اللي عليها المصنع
و فضل يعصر دماغه ..
اي حتة من الارض
يبعها علشان يشتري المكن ؟؟
يفكر .. و يفكر و يفكر
لحد وهو ماشي ..
حس بحاجة لازقة في رجلهبي
بص لقاه العسل
(فاكرين العسل .. قلته في الاول خالص )
المهم وهو عاصر دماغه ..
مخدش باله ان العصاياخبطت في طبق العسل ..
ووقعته و كسرتهالعسل اتدلق .. و حلمه راحليه ؟؟؟
علشان فضل يحلم
و مخدش باله انه الاول
لازم يبعد العسل عن مرمى العصايا
و بعدين يبيعه
منكرش اني نمت في وسط الحكاية
بس والله استفدت ياناس
و مع ان اختلاف الرأي لسه قائم بننا
وانا مصممة انه لازم تحلم حلم كبيريشجعك على الوصول للافضل
الا اني حبيت الحكاية و استفدت منها
انتوا بقى
ايه في حياتكم العسل و ايه العصايا ؟؟؟؟؟؟؟؟؟؟؟؟

تخاريف(3) .. مرايتي يا مرايتي

كعادة كل البنات
هواية الوقوف قدام المرايا بالساعات
كنت كدة وانا صغيرة .. وانا في ابتدائي و اعدادي تحديداً

بس مش زي كل البنات
مش احساس كل البنات قدام المرايا
كنت دايما لما ابص لنفسي اقول .. دي مش انا
لا .. دا مش شكلي .. انا اكيد احلى من كدة
انا اه شايفة نفسي كدة
بس عنيا غلطانة .. دا مش شكلي
و اكيد الناس مش شايفنني كدة
شايفين الصح .. شايفين شكلي الحقيقي


مرة واحدة وقفت قدامها
و بخيال واسع
و تأثراً بفيلم snow white
سألتها
مرايتي يا مرايتي
مين احلى
انا ولا .. الفنانة اللبنانية اليسا :$
حسيتها بتقولي انتي هبلة
اليسا طبعا
و ضحكت عليها من قلبي
مهو دا اللي انتي فالحة فيه يا مرايتي


كنت متدايقة اوي
ومكنتش بطيق المرايا
ولا احب اشوف نفسي فيها .. ابداً
كنت احيانا اعدي من قدامها حاطة وشي في الارض
و اقاوم لو راسي حاولت تلف و تشوفني فيها
لحد ما في مرة اجبرت نفسي على الوقوف قدامها


لحد ما اكتشفت اني كدة .. انا كدة
دي ملامحي .. دا شكلي
بس عمري ما قلت ياريتني كنت شبه دي او دي
مع اني مش جميلة الجمال المبهر دا
لا عندي عيون هيفا ولا جسم نانسي ولا الكلام دا خالص
بس فضلت مقتنعة ان جمالي الداخلي .. ممكن يظهر و يبقى خارجي
فأكون احلى واحدة .. و لو قدام نفسي بس


اكتشفت اني قبلت نفسي كدة
على عيوبي .. لاني شيفاها احلى حاجة فيا
و لان الانسان من غير عيوب .. مش انسان
و ان سعادة الانسان
تكمن .. و خلوا بالكم من تكمن دي
في تقبله لنفسه زي ماهو


كلامي قدام المرايا مش كتير زي بعض البنات
لكن لما بشوفني فيها .. ببتسم
و بقول الحمدلله