انا من جيل الثورة

انا عمري ما تخيلت انو هييجي عليا يوم واقول

انا من جيل الثورة ...

معقول اللي حصل دا ؟؟؟؟؟؟؟؟؟؟؟؟؟؟؟؟؟؟؟؟

هي دي مصر بجد اللي حصل فيها كدة ؟؟

هو دا الشباب المصري بجد اللي عمل كدة ؟؟

شباب النت هو اللي قام و هز الدنيا كدة !!

شبابنا ,, شباب بلدي ...

اخيرا لقتهم بيتحركوا يا مصر ..

بيصرخوا بأسمك و بينادوا عليكي ...

دول بيحبوكي اوي .. اوي ..

شفتي عملوا علشانك ايه ,, لاء والاحلى انهم مخافوش من حد ..

انا مش قادرة اعزيكي في ولادك اللي استشهدوا ,, دول ضحوا بارواحهم علشانك ..

علشان بيحبوكي اوي ,, و عاوزين مستقبلك يبقى احسن ..

ضحوا بدمهم وهما فرحانين ,, علشان عارفين و متأكدين انك هتبقي احسن ..

متزعليش يا حبيبتي ...

دول في الجنة ,, ولادك دلوقتي في الجنة ..

بيبصوا عليكي من فوق و بيقولولك بنحبك اوي ..

بيقولوا الله اكبر و فرحانين بالنصر ..

ولسه ,, و لسه ان شاء الله اللي جاي احسن و احسن ..

كل ولادك بيقولولك آسفين ,, آسفين اننا فضلنا ساكتين كل الوقت دا ..

احنا كنا بنحلم بس ,, و دلوقتي اخيراً بدأنا نحقق الحلم دا ...

و هنفضل نحلم و نحلم ونحلم ,, و ان شاء الله هنحققه يا حبيبتي ..

مهما حاولوا يضللونا ,, و شوية يستعطفونا ,, مش هنرجع عن قرارنا بأرجاع كرامتك وحريتك ..

هما قاولوا على فلان خاين ,, او قاولوا على فلانة بتضللنا ...

احنا ماشيين على هدى الله و هداكي ..

انتي وبس اللي هنموت علشانها ,, لانك امنا ,, وحبيبتنا , لانك مصرنا مش مصرهم هما ..

وهقولك ايه بس مش لاقيه كلام .. بحبك اوي و فخورة بيكي و بان العالم بيشهد بولادك و بيحلف بيهم و بشجاعتهم ..

من النهاردة و كل يوم ,, انتي الفرحة ,, انتي النور ....

هنحقق احلامنا ,, بس احنا نحلم ,, و منخافش من الاحلام ...

بحبك يا مصر ..

peter pan & NEVERLAND

من اكتر الشخصيات الكرتونية اللي بحبها في حياتي هي ( بيتر بان ) .....

من وانا صغيرة و لحد دلوقتي بحب اوي اي حاجة ليها علاقة بيه ....

دايما بفكر في انه محظوظ , طفل مبيكبرش و عايش في مكان اكتر من رائع ..

و مع انها شخصية خيالية بس بتأثر فيا جداً ,, و بالذات بقى neverland المكان اللي كان ( بيتر بان ) عايش فيه ..

كنت دايما بقو يااااه لو دا مكان موجود بجد ,, اكيد مكنتش هتدايق ابدا ,

ولا كنت هتردد و لو لثانية اني اروح اعيش هناك ...

و على فكرة هي دا معني القصة كلها .....

يعني , كل واحد فينا بيدور على مكان يلجئله لما يتدايق او لما يحب يختلي بنفسه شوية ..

المؤلف بيقول مش لازم يبقى المكان موجود على ارض الواقع , لانك تقدر تعمل كل حاجة , من خيالك ..

يعني لما تحب حاجة و تؤمن بيها اوي .. بتتحقق ....

وانا حبيت المبدأ دا جدا ,, مبدأ متفائل كدة و بيحسسني ان مفيش حاجة في الدنيا مستحيلة وان اللي بنحبه هيحصل لو بس ,, آمننا بيه ..

في اسهل من كدة ؟؟

حقيقي لما بشوف فيلم finding neverland او فيلم peter ban بحس ان مزاجي كله بيتغير ..

اكيد لانه قصة كتابة و بداية شخصية (بيتر بان ) , بس كمان لانه بيديني احساس انه اقل الاشياء ,, ممكن تبقى حاجة

جميلة جدا بس لو استخدمنا خيالنا فيها ...

كاتب مبدع ,, و شخصية ممتعة ,, و فيلم هفضل طول عمري بحبه ولا هقدر ازهق منه ابدا ...

تخاريف (13) .. انت ايه يا أخي ؟؟

دايما بفكر بيني و بين نفسي
ليه انا ... ؟؟؟
و مكنتش بلاقي اجابة
غـــيــــر ....


التخريفة الثالثة عشر


ساعات كتير بحس انك
كتــــــير .. كتير اوي
و بستغرب
بستغرب اخترتني انا ازاي !!1
و بسأل نفسي .. هو انا بحلم
ولا دا بــجـــد ؟؟؟


هو انت كنت واخد بالك
انك بتقولهالي انا ؟؟؟؟
متضحكش
انا بتكلم بجد
دايما بفكر بيني و بين نفسي
ليه انا ... ؟؟؟
و مكنتش بلاقي اجابة
غير ضحكتك دي
آآآه منك انت
تضحك
و تسكت
بس عنيك بتقول كتير اوي

انت ازاي بتعمل كدة؟؟
ازاي بتخليني مبسوطة اوي اوي كدة
بتعلقني بيك كدة ازاي ؟؟
خلتني اموت في كل حاجة فيك
بعشق تفاصيلك
حتى الحاجات الصغيرة
اللي انت شخصياً .. مش واخد بالك منها

بحب اقعد قدامك اوي و انت بتتكلم
كل كلمة بتقولها
بتسيب جوايا احساس
غريب
غريب بجد
حماسك و انت بتتكلم عن حاجة بتحبها
ماتشات الكورة
الكومبيوتر
الفيس بوك حتى
كل كلمة , بتاخدني باحساس غريب
ببقى حاسة اني اسعد واحدة في الدنيا
و انت بتتكلم

حتى و انت ساكت
و انت سرحان في حاجة مهمة
او مشكلة بتفكر فيها
العقدة اللي بتطلع على جبينك
من كتر التفكير في المشكلة
العويصة اللي بتواجها دي
بموووت فيها

عارفة انك بتستغرب لما بسألك
بس اعذرني
منا بحس كتير انك مش بني آدم
آه .. مش بني آدم ابدأً
انت حاجة كدة .. متتوصفش
بـــجــــد
كتير بحس انك ملاك
نزلتلي من السما في ليله
كنت تعبانة اوي فيها
و من يومها .. بطلت اتعب
او اخاف .. او اشيل هم اي حاجة
مهو بالعقل كدة
هشيل هم اي حاجة او اخاف ازاي
وانت موجود جمبي .. و انت معايا
لما بيبقى الملاك الحارس موجود
مش ممكن تخاف
وانت ملاكي .. و بتحرسني
ازاي بعد كدة اخاف ؟




دي صورة كدة
حستها اوي
هتقولوا بقى حقيقة و موجودة
هتقولوا مستقبلية
مش عارفة
انا حستها و قلت تشاركوني فيها
زي ما شاركتوني تخاريفي قبل كدة
:) :) :)

تخاريف (12) ... انتي .. طالق

و فجأة
خرج الكارت الاحمر من بقه

التخريفة الثانية عشر

احب بس في الاول اذكر
انها حدثت بالفعل

انا كنت بسمع وانا مش مصدقة بجد
لان الحكايات دي مكنتش بشوفها
غير في التلفزيون .. اشوفها ع النت
و كنت برضو بحس انها مبالغ فيها
لكن لما تحصل لحد قريب مني
كتيييييييييييير اوي عليا
وهي بتحكي انا كنت ماسكة
دموعي بالعافية على حال ناس
مكنتش اتخيل ان في يوم يجرالها كدة

هحكيلكم من الاول
لما يبقى واحد بيحب في واحدة فوق ال 10 سنين
و هيموت .. هيموت .. هيموت بجد و توافق عليه
و لما توافق يبقى هيتجنن من السعادة
و يقضيها بقى حب و نحنحة و سهر و كلام في التليفون
و ندخل بقى شوية في الجد
الشبكة و كتب الكتاب و اليلة الكبيرة ياعمي و العالم كتيرة
و مسؤلية و بيت و بنوتة جاية ف السكة
ووصلت للدنيا و سيادتك مش هنا و قلنا ظروف شغل و عديها
و عاشت البنوتة مع مامتها و كبرت و انت برضو مش هنا
و لسه بنقول ظروف شغل و عديها
و كل دا و انت بعد الجواز مقعدتش غير شهرين و خلعت
و برضو قلنا ظروف شغل و عديها
لكن تيجي يوم ما البنت تتم سنة من عمرها
و تطلع الكارت الاحمر
بجد مش لقيالك وصف
و حرام فيك الشتيمة لانها ممكن تكون للبني آدمين
و انت في نظري .. مش بني آدم

فجأة كدة و بدون مقدمات
خرجت الكارت من بقك وقلت
من حياتي (out ) انتي
و دا كله .. بدون سبب
طمع في حتة لاب .. و كاميرا دجيتال
تهريج دا .. حاسة ان في واحد غتت
هيطلع دلوقتي و يقوللي
الفقرة دي اتصورت
لو حابب تذيع قول ذيع
مش حابب قول متذعش
!!!!!!!!!!!!!!!!!!!!!!!
و كأننا في فيلم عربي تجاري رخيص
الاحداث بتحصل فيه من غير سبب
و في الاخر برضو
يطلع واحد متعرفش منين
و يقولك
اصل المخرج عاوز كدة
!!!!!!!!!!!!!!!!!!!!!!!

هنقول فكر في ايه
هو اصلا فكر ؟؟؟؟؟
مفكرش طبعا
معملش خاطر لحبه .. لو سميناه حب يعني
ولا لبنته .. اللي على رأي اللي قالتها
لا تعرفلها اب من رب
يوم ما تتم سنة يا ضلالي .. تكون مطلق مامتها
انت حمار يا حمار
مفكرتش فيها ازاي ؟؟؟؟؟
مفكرتش تأثير دا عليها لما تكبر هيكون ايه ؟؟؟؟؟
آه هتتربي مع مامتها و اهل مامتها
و مش هتبقى محتاجة حاجة مادية
بس هي كانت محتاجاك انت
محتاجة تحس انها عايشة في جو مستقر
مع بابا .. و ماما .. و جدو .. و خالو و خالتو
الجو الاسري الطبيعي

معقولة ياربي
انت دماغك فين ؟؟
معملتش ليه حساب للعشرة و الحب
اللي قعدت حبه دا كله
ولا هي علشان بنت ناس فقلت اديها
دوس ولا يهمك .. مهي مش هتتكلم

انتوا عارفين ايه التحليل
الوحيد للي حصل دا
المسؤليه .. ايوة
لما لقى الحكاية دخلت في بيت
و وولاد .. و مصاريف
و مسؤلية قد كدة
قالك لا انا اخلع احسن

طيب غور بقى
في ستين الف داهية و مش هقول سلامة
سيبوني
انا جوايا مراااااااااااااااااااااااا

ر
مرار من ال....... دا
بس عشان هو الراجل
اداها رجل لما الموضوع معجبوش
و طبعا دلوقتي نظرة المجتمع زي اي وقت
للمطلقة .. هي الغلطانة لو كانت ايه
و هو .. لا يمكن هيجيبوا الغلط عليه

طيب هي اتطلقت
و هو .. مش لاقيه كلام بجد
اللي هتتهرس في الرجلين
البنت .. يا حبيبتي
ربنا يعوض مامتها خير فيها
و يعوض البنت بحد يكون احن عليها
من ابوها .. اللي مش فاهم لحد دلوقتي
يعني ايه زوج محترم .. و أب حنين


ملحوظة
اياكم اسمع حد فيكم بعد كدة
بيقوللي عقبال ما نفرح بيكي
او
امتى هنفرح بيكي
او
ربنا يرزقك بأبن الحلال
أو
اي حاجة من هذه الاقوال
لاني كنت مبثقش في الرجالة بنسبة 80%
دلوقتي بقت 950%
و محدش برضو يقوللي اصل صوابعك مش زي بعضها
اصل مش عارفة ايه
كله بقى زي بعضه يا ناااااااس
لحد دلوقتي مشوفتش غير خيانة .. و غدر
و على ايه بقى
انا كدة حلوة اوي .. في بيت ابويا بكرامتي
ايــــــــاكم
وانا بقول اهو .. انتوا احراااار

تخاريف (11) شبابيك

شابيك
الدنيا كلها .. شبابيك

التخريفة الحادية عشر

الدنيا فعلا .. كلها شبابيك
و وراها حواديت و حكايات
دنيا تانية ورا الشبابيك
ضحك .. و دموع .. فرح .. و حزن
هدوء .. و دوشة .. عالم تاني ورا الشبابيك
بحلوه .. و مره .. بنعيشه

مش مهم ايه اللي برا شباكك
المهم اللي ورا شباكك
لو كان حلو .. استمتع بيه لاخر لحظة
عيشه
و لو مر .. سيبه ياخد وقته
بس متسيبوش يسيطر عليك

حب شباكك
و لونه .. أرسمه تاني
خطوط بالطول و العرض
وكل خط بوردة
وردة جديدة بتتفتح في شباكك
تلونه .. تغيره .. تجدده
و تشيل منه الكآبة و الضلمة
تشيل منه الاحزان
لون الشباك .. يمكن اللي ورا ياخد لونه
و الحزن و الكآبة تروح منه

مهما كان الحزن و الالم ورا الشبابيك
متسبهاش مقفولة
افتحها .. خلي الشمس تعديها
و توصلك
خليها مفتوحة .. يمكن الحزن يغلط
و يخرج منها

حتى لو الهوا قفلها
اعند معاه .. و افتحها تاني
يمكن تتعب
و تحس ان طاقتك خلصت
بس بلاش تيأس
افتحها تاني .. و تالت و رابع

سيب النور يدخل
و خلي الشبابيك مفتوحة


******
في لحظة تجلي كدة
بس منكرش ان الالهام
كان بسبب ناس مسابتنيش
في عز يأسي
******
الى اصدقائي .. شكراً جزيلا

تخاريف (9) .. حلمت بيه

جرعة تفاؤل كدة ع السريع
يللا كل واحد يخطفله شفطة قبل ما تخلص

التخريفة التاسعة

انا عادة مش بحلم كتير
يعني ممكن اقعد 4 او 5 ايام
محلمش بحاجة خالص
و بعد الفترة دي لو حلمت
بتبقى يا حاجة حلوة اوي
يا وحشة اوي اوي
و الحمدلله .. المرة دي .. كان حلم
حلو اوي .. يجنن

مش هقولكم حلمت بمين
او بايه .. بس هقولكم على حاجة
انا بجد صحيت مستغربة منها
كنت مبسوطة جدا في الحلم دا
اوي اوي اوي .. بجد
كنت ماسكة في اللحظة اللي مبسوطة فيها بطريقة
و كأني عارفة اني في حلم
و كدة كدة هصحى منه
فضلت ماسكة في دراعه
دراع الحلم .. :$ :$
و حاسة اني لو سبته هيطير ..
كنت حاسة بأمان غير عادي
و حنان و طيبة و نعومة محستهمش قبل كدة
غير في حضن امي .. بس لقتها فيه

لون ابيض
و صفاء
وراحة نفسية .. فعلا مش موجودة
غير في الاحلام
:$ :$ :$ :$

دموع السعادة
مختبرتهاش كتير في حياتي
كانت مرة واحد
و في الحلم دا
او بمعنى اصح
بعد الحلم دا
كانت تاني مرة
احساس بجد ميتوصفش
و الكلام ميوفيهوش حقه

متركزوش في الحتة دي
بس المهم اني كنت مبسوطة اوي
اول مرة اعرف يعني ايه كلمة
عــــــــــيــــــــــــش اللحـــــــــــظة

و كانت احلى لحظة في حياتي
مع انها مش حقيقة
بس خلتني اسعد واحدة في الدنيا
و لحد دلوقتي مبسوطة اوي اوي بسببها
صحيح لما صحيت زعلت اني صحيت
و ان الحلم خلص
بس فرحت اوي بالحلم دا
لانه واحد من الاحلام الحلوة
اللي بيتعدوا في حياتي

عاوزة اقولكم انتوا كمان
لازم تعيشوا اللحظة الحلوة
لما تلاقوها امسكوها و مستيبوهاش
طولوا فيها على قد ما تقدروا
لو تقدروا تخلوها ساعات .. ايام .. شهور او سنين
ياريت .. يبقى حلو اوي
لانكم لو سبتوها تعدي و تمر مرور الكرام
او خليتوا الحزن يدخلها
او الشك يسيطر عليها
صدقوني هتندموا اوي اوي اوي اوي
من هنا للسنة الجاية

انا عشت عمر في الحلم دا
عمر بتمنى اعيشه في الواقع
و لو محصلش مش هزعل
لان حلمي دا
هيديني الطاقة لاخر عمري
هيفضل الحاجة اللي مخلياني اصبر
والامل اللي هينور الايام الجاية بالنسبة لي
انا عارفة انه كتير منكم هيقول ايه دا؟؟
دا حيا الله حلم
بس بالنسبة لي
هو مش مجرد حلم
لاني لقيت سعادتي فيه
و عندي حاجة كدة بتقولي
انه هيتحقق



انا كأبتكم كتير قبل كدة بتخاريفي
و لما جات الفرصة اللي فرحت فيها
قلت افرحكم معايا

وآدي جرعة التفاؤل للناس اللي كانت طلباها
علشــان محدش يزعل مني
:D :D

تخاريف (8) .. خد بالك من نفسك

خد بالك من نفسك
لان محدش هيحس بنفسك غير نفسك

التخريفة الثامنة

كل ما تكتر الهموم و تزيد الاوجاع
و تحس بنفسك مخنوق .. و تعبان
موجوع بجد .. من كتر اللي بتشوفه
او بتسمعه .. او بتعمله
بيبقى نفسك تلاقي اللي يخفف عنك
و بطبيعة الحال .. هتفتكره اقرب حد ليك
اقرب حد ليك .. صاحب او حبيب .. او .. او
هتجري عليه و تشكيله
بس افرض هو مفهمش .. محسش
هتعمل ايه ؟؟؟؟؟؟؟؟؟

اكيد هتتوجع زيادة
لان ظنك .. مش في محله
دايما بيتهيئلنا ان اقرب حد لينا
هو دا اللي في ايده الدوا لكل حاجة في حياتنا
همومنا .. اوجاعنا .. حيرتنا
بس ممكن يكون هو اللي بيزودهم عندنا
لانه مش فاهم .. ولا حاسس

عارفين بقى الحل فين ؟
فينا احنا
الاحسن لينا وللي حولينا
اننا ناخد بالنا من نفسنا
و نسمع نفسنا
و منحطش املنا في حد معين اوي
لانه ممكن ميفهمش .. ولا يحس
خد بالك من نفسك
لان محدش هيحس بلي فيها غيرها
محدش هيفهمك قد نفسك
يبقى تروق كدة
و تسمعها
و تحل مشاكلها لوحدك .. و بنفسك

اللي أكتشفته قريب اوي
ان محدش بيحس بوجع التاني
ولا بيفهمه قده
يبقى مفيش حل غير
انك تسمعها .. و تواسيها بنفسك

و مهما زادت الهموم و الاوجاع
اعرف ان الكبير فوق كل شيئ
وانك حتى لو مفيش حد حوليك
فا ربنا .. وحده .. معاك